ஜார்க்கண்ட் மாநிலத்தில் நவம்பர் 13 மற்றும் 20ம் தேதிகளில் வாக்குப்பதிவு நடைபெற உள்ளது. 81 சட்டமன்ற தொகுதிகளைக் கொண்ட ஜார்க்கண்ட் மாநிலத்திற்கு இரண்டு கட்டமாக தேர்தல் நடைபெற உள்ளது. இந்த தேர்தலில் சுமார் 2.60 கோடி மக்கள் வாக்களிக்க உள்ளனர். இதில் பதிவாகும் வாக்குகள் நவம்பர் 23-ந்தேதி எண்ணப்பட்டு முடிவுகள் அறிவிக்கப்பட உள்ளது.
ஜார்கண்ட் மாநிலத்தில் ஆட்சியை கைப்பற்ற பாஜக கூட்டணியும், ஆட்சியை தக்க வைத்துக்கொள்ள முக்தி மோர்ச்சா தலைமையிலான இண்டியா கூட்டணியும் தீவிரமாக செயல்பட்டு வருகிறது.
இந்நிலையில் பாஜகவை சேர்ந்த முன்னாள் எம்எல்ஏக்கள் 3 பேர் உள்பட பலர், பாஜகவில் இருந்து விலகி, ஹேமந்த் சோரன் கட்சியில் இணைந்துள்ளனர். இது பாஜகவுக்கு அதிர்ச்சியை ஏற்படுத்தி உள்ளது.
சமீபத்தில் மூன்று முறை எம்.எல்.ஏ.-வாக இருந்த கேதார் ஹஸ்ரா மற்றும் ஏ.ஜே.எஸ்.யு. கட்சி தலைவர் உமாகந்த் ரஜக் ஜார்க்கண்ட் முக்தி மோர்ச்சாவில் இணைந்தார். தற்போது லோயிஸ் மராண்டி, குணால் சாரங்கி, லக்ஷ்மன் டுடு ஆகியோர் ஜார்க்கண்ட் முக்தி மோர்ச்சா கட்சியில் இணைந்துள்ளனர்.
தேர்தல் நடைபெற இன்னும் மூன்று வாரங்களே உள்ள நிலையில், முக்கிய தலைவர்கள், முன்னாள் எம்எல்ஏக்கள் ஜார்கண்ட் முக்தி மோர்ச்சா கட்சிக்கு தாவியிருப்பது சலசலப்பை ஏற்படுத்தி உள்ளது.