சர்வதேச சந்தையில் கச்சா எண்ணெய் விலையின் அடிப்படையில், சிலிண்டர் விலைகளை எண்ணெய் நிறுவனங்கள் நிர்ணயிக்கின்றன. இதற்காக ஒவ்வொரு மாதம் 1-ம் தேதி புதிய விலைகளை அறிவிக்கின்றன.
இந்த மாதத்திற்கான கேஸ் சிலிண்டர் விலை பட்டியல் தற்போது வெளியிடப்பட்டுள்ளது. அதன்படி, சென்னையில் வர்த்தக பயன்பாட்டுக்கான 19 கிலோ எடை கொண்ட சமையல் எரிவாயு சிலிண்டர் விலை ரூ.16 உயர்ந்துள்ளது.
சென்னையில், வர்த்தக பயன்பாட்டுக்கான 19 கிலோ எடை கொண்ட சமையல் எரிவாயு சிலிண்டர் விலை ரூ.1,964.50 இருந்த நிலையில், இன்று முதல் ரூ.1,980.50-க்கு விற்கப்படும் என பொதுத்துறை எண்ணெய் நிறுவனங்கள் தெரிவித்துள்ளன. கடந்த நவம்பர் மாதத்தில், வர்த்தக பயன்பாட்டுக்கான சிலிண்டர் விலை ரூ.61.50 உயர்ந்தது.
வீட்டு உபயோக சிலிண்டர் விலையில் எந்த மாற்றமும் செய்யப்படவில்லை. அதனால் வீட்டு உபயோக சிலிண்டரின் விலை ரூ.818.50 என்ற அளவிலேயே தொடர்கிறது. இதனால் பொதுமக்கள் நிம்மதி அடைந்துள்ளனர்.